‘O Cavone

di Davide Brandi

A Nnapule tutte quante nuje ‘o cunuscimmo comme ‘O Cavone (latino *cavo -nis, der. ‘e cavus «cavo»), ma ‘sta via piglia nomme ‘e Francesco Saverio Correra, nu prufessore e avvocato ca fuje pure Cunsultore ‘e Stato sotto ê Borbone e po’ pure doppo l’Unità d’Italia. Ma pecché ‘sta via ‘a chiammammo Cavone?
Pecché ‘sta ncatastata dint’ ô ttufo e ttant’anne fa, ccà passava l’acqua ca scenneva ‘a coppa a ll’Arenella e scennenno scennenno aveva scavato nu CANALONE ‘e scolo ca jeva a mmare ma è cchiammato accussì pure pecché ccà ce steveno ‘e ccave ‘a do pigliavano ‘o ttufo pe ffravecà ‘e ccase.
A cchilli tiempe, ‘O CAVONE steva fore d’ ‘e mmure d’ ‘a città e tuorno tuorno a cchesti ccà, ce steva nu bbosco cupo cupo cu bbestie e ppure cu ttanti cuniglie. ‘O rre Alfonso d’Aragona ce jeva a ccaccia e ffacette fravecà na bbella villa ca pigliaje nomme “Cunigliera”. Ogge ‘sta villa nun ce sta cchiù pecché ncoppo e attuorno a essa è stato fravecato ‘o palazzo Muscettola ‘e Luperano.
‘O Cavone è na via ca scenne ‘a coppa a ll’Arenella (via Salvator Rosa, na vota chiammata ‘a Nfrascata pe vvia ca ce steveno tant’ arbere ca devono friscura) e sponta a vvia Pessina, primma ‘e piazza Dante (ca na vota se chiammava Largo Mercatello pe vvia ca ce facevano nu bbellu mercato ‘e frutta e vverdumma ca veneva ‘a coppa ô Vommero, e ppe cchesto chille ‘e Napule vascia chiammavano “vrucculare” a chille ca scennevano d’ ‘o Vommero) e se ponno vedè ancora ‘e mmure ‘e l’acquedotto romano ca purtava l’acqua d’ ‘o ciumme Serino, ‘o Funneco San Potito, ‘o Funnaco Ragno e ‘o Funnaco Santa Monica.‘E funneche (‘a ll’arabbo “fundaq” = magazzino) na vota erano ausate p’astipà ‘a merce, po’, chianu chiano, so’ addiventate ‘e ccase p’ ‘a ggente cchiù puverella.
‘O Funneco Santa Monica, è nu piezzo ‘e Napule assaje verace pecché pare nu presepio e ppare ca lloco ‘o tiempo s’è ffermato a ll’800.
Ô nummero 22 d’ ‘o Cavone, ce sta nu palazziello ca pare comme a tanti ati palazze ma è assaje mpurtante p’ ‘a storia ‘e Napule, ‘e l’italia e ppure d’ ‘o munno, pecché lloco è addó nascette, ô 5 ‘e dicembre d’ ‘o 1861, ‘o ggenerale d’ ‘a primma guerra mundiale Armando Diaz, ‘o napulitano ca salvaje ll’Italia doppo ‘o lisciabbusso ‘e Caporetto vincenno ‘a bbattaglia d’ ‘o Piave.
Si passate ‘a llòco, facitavella na cammenata pe ddint’ ô Cavone, ne vale overamente ‘a pena pecché ‘e funneche so’ ccoccòsa ca s’ha dda vedé, po’ me dicite vuje a mme!